Semeytany.kz – Семей қаласында ұлы ақынның 180 жылдығына арналған онкүндік аясында өткен «Абай QUIZ» республикалық зияткерлік ойынына 180 команда, яғни 1080 адам қатысты.
Зияткерлік сайыстың мақсаты – Абай мұрасын жастарға заманауи форматта дәріптеу, білім мен ғылымға қызығушылықты арттыру және қазақ тіліндегі интеллектуалды ойындарды дамыту. Шараны облыстық Жастар саясаты мәселелері басқармасы ұйымдастырып, Семей қаласы әкімдігі қолдау көрсетті.
Ойынның ашылу салтанатында Абай облысы әкімінің орынбасары Мейірлан Раханов қатысушыларға сәттілік тілеп, бұл шараның ел тарихында қалатын ерекше оқиға екенін атап өтті. Оның айтуынша, бұл ауқымды жоба еліміздің интеллектуалды әлеуетін айшықтап қана қоймай, ұлттық сана мен рухани жаңғыруға серпін береді.
Білім сайысына Астана, Алматы, Шымкент қалалары мен Шығыс Қазақстан, Түркістан, Ақмола, Атырау, Маңғыстау, Жамбыл және Абай облыстарынан келген командалар қатысты. 180 команданың бір мезетте қатысуы – республикалық деңгейдегі рекорд саналып, Қазақстан рекордтар кітабына ұсынылды.
«Абай QUIZ» 7 кезеңнен тұрды. Сұрақтар Абай шығармашылығынан бастап, түрлі салаларды қамтыды. Жалпы жүлде қоры – 4,7 млн теңге. Нәтижесінде, 1 орынды Астанадан келген «Brainstorm» командасы иеленіп, 1 миллион теңге жеңіп алды. 2 орын – «Алматы Микс», 3 орын – «Тұрақсыз тіркестер» (Семей) командасына бұйырды. Сонымен қатар, үздік өнер көрсеткендер түрлі номинациялармен марапатталды.
