Semeytany.kz – Абай облысында қазақ күресінен республикалық чемпионаттың ашылу салтанаты өтті. Дүбірлі додаға еліміздің барлық өңірлерінен келген 400-ге жуық палуан қатысып жатыр.
Чемпионат жасөспірімдер мен ересектер арасында өтуде. Қатысушылар 8 салмақ дәрежесі бойынша бозкілемде бақ сынауда. Ұлттық спортты дәріптеген бұл жарыс палуандардың шеберлігі мен қайратын сынайтын алаңға айналды.
– Турнир өте жоғары деңгейде ұйымдастырылған. Қазақ күресіне деген қызығушылық жылдан-жылға артып келеді. Мұндай шаралар ұлттық спорттың дамуына серпін береді. Барша қатысушыларға сәттілік тілеймін, – деді Қазақ күресі ассоциациясының бас директоры Дамир Бекбосынов.
Жеңімпаздар мен жүлдегерлер кубоктармен, медальдармен, құрмет грамоталарымен, сондай-ақ бағалы сыйлықтармен және қаржылай сыйақымен марапатталады. Жарыс 6 тамызға дейін жалғасады.
