Semeytany.kz – Бүгін Абай облысының әкімі Берік Уәлидің төрағалығымен өткен кеңейтілген аппарат жиналысында Алакөл жағалауындағы жұмыстар мен «Таза Қазақстан» бағдарламасының жүзеге асырылуы талқыланды.
Жиынға облыстық басқарма және департамент басшылары, қала-аудан әкімдері бейнебайланыс арқылы қатысты. Туризм басқармасы, Төтенше жағдайлар және Полиция департаменттері, сондай-ақ Мемлекеттік кірістер департаментінің өкілдері Алакөлге қатысты өз бағыттары бойынша есеп берді.
Алакөл жағалауында санитарлық тазалық пен инфрақұрылымды жақсартуға арналған жұмыстар жалғасуда. 70 қоқыс жәшігі мен 50 контейнер орнатылып, тазалықшылар саны 35 адамға артты. Қосымша екі техника алынған. 7 құтқару мұнарасы, 6 пирс, 30 шешінетін кабина, 8 жаңа дәретхана және түрлі тыйым белгілері қойылды. Жағалауды нығайту жобасы әзірленуде. Қауіпсіздік үшін күнделікті 5 су көлігі мен 3 өрт сөндіру техникасы кезекшілікке тартылған.
Қазіргі таңда құтқару станциясы мен Қабанбай ауылында өрт сөндіру депосы салынып жатыр. Сонымен қатар, көл маңында су полициясын құру және банкоматтар орнату жұмыстары қолға алынады.
«Таза Қазақстан» бағдарламасы аясында 57 мыңнан астам ағаш отырғызылып, 45,8 мың тонна қоқыс шығарылған. Ғарыштық мониторинг нәтижесінде 182 заңсыз қоқыс үйіндісі анықталған, оның көбі Семей, Жаңасемей, Аягөз, Бесқарағай және Бородулиха аудандарында орналасқан.
Жиын қорытындысында облыс әкімі жағалаудағы заңсыз сауданы жою, жағажайларды заңдастыру, салықтық ашықтықты арттыру мен қауіпсіздік шараларын күшейту бойынша нақты тапсырмалар жүктеді.
