Semeytany.kz – Абай облысының әкімі Берік Уәли Қазақстанның Әзербайжандағы елшісі Әлім Байелмен және бірқатар әзербайжандық инвесторлармен кездесті.
Кездесуде Әзербайжан-Қазақстан Іскерлік кеңесінің өкілдері, Түркі кәсіпкерлер қауымдастығы мен инвестициялық холдингтердің басшылары Алакөл жағалауында халықаралық емдеу-сауықтыру кешенін салу туралы ұсыныс айтты. Жоспар бойынша жыл он екі ай жұмыс істейтін, бір мезетте 800 адамды қабылдай алатын шипажай кешені бой көтермек. Инвестиция көлемі – 20 млн АҚШ доллары. Жоба жүзеге асса, 200-ге жуық жаңа жұмыс орны ашылады.
Елші Әлім Байел бұл жобаның Қазақстан мен Әзербайжан арасындағы инвестициялық ынтымақтастықтың алғашқы нәтижелерінің бірі болатынын атап өтті.
Өз кезегінде аймақ басшысы Берік Уәли мұндай жобаның өңір үшін маңызы зор екенін айтып, Алакөл туристік аймағынан арнайы жер телімі бөлінетінін және әкімдік тарапынан қолдау көрсетілетінін жеткізді.
