Semeytany.kz – Семей қаласында Абайдың 180 жылдығына арналған «Адамзаттың Абайы» атты республикалық ақындар айтысы басталды.
Абай атындағы театр сахнасында өткен өнер додасына еліміздің түкпір-түкпірінен келген 12 айтыскер қатысуда. Олардың алтауы – «Алтын домбыра» иегері. Айтысты белгілі айтыскер, Мәжіліс депутаты Аманжол Әлтаев жүргізіп, қазылар алқасына Жүрсін Ерман төрағалық етуде.
Салтанатты ашылу рәсімінде сөз алған облыс әкімі Берік Уәли Абай елінің рухани мұрасын, тұңғыштар мекені ретіндегі тарихи маңызын атап өтіп, айтыскерлерге сәттілік тіледі.
– Бұл жолғы айтыс өзгеше. Мұнда елге танымал ақындардың бәрі жиналды. Абайды «қазақ ренессансының басында тұрған тұлға» десек, сол ренессанстың шарықтау биігі – алаш арыстары. Осы рухты бүгінгі ақындар жалғайды деп сенеміз, – деді аймақ басшысы.
Айтыс аясында бірқатар айтыскерлер мен термешілер халықаралық одақтың мүшелігіне қабылданып, «Мәдениет саласының үздігі» төсбелгісімен марапатталды.
Көрермендер үшін Абай театрының алдына LED-экран орнатылып, айтыс тікелей көрсетілуде.
