Semeytany.kz – Абай облысында ұлы ақынның 180 жылдығына арналған онкүндіктің сегізінші күні «Жеті қазына» атты республикалық мәдениет, спорт және туризм фестивалімен жалғасын тапты. Фестивальдің ашылу салтанаты Қарауыл ауылындағы Абай саябағында өтті.
Үш күнге созылатын ауқымды шара аясында халқымыздың дәстүрлі құндылықтарын насихаттайтын түрлі сайыстар ұйымдастырылған. Атап айтқанда, «Ер жігіт», «Сұлу әйел», «Ілім-білім», «Қыран бүркіт», «Жүйрік ат», «Құмай тазы» және «Берен мылтық» аталымдары бойынша қатысушылар өз шеберліктерін көрсетеді.
Қазіргі уақытта Абай саябағында ұлттық сұлулық пен нәзіктікті ұлықтайтын «Сұлу әйел» сайысы өтіп жатыр. Оған еліміздің әр өңірінен келген 25 бойжеткен қатысуда. Ал аудандық Мәдениет үйінде «Ілім-білім: Абай оқулары» байқауы өтуде. Онда 25 үміткер ақынның өлеңдері мен қара сөздерін мәнерлеп оқып, Абай мұрасын дәріптеуде. Сонымен қатар «Ер жігіт» сайысы да басталып, қатысушылар теңге ілу, қазақ күресі, қой көтеру сияқты ұлттық спорт түрлерінен сынға түсіп жатыр.
