Semeytany.kz – Абайдың 180 жылдығына арналған «Абайға құрмет» акциясы аясында Семейде алғашқы нысанның құрылысы басталды. Маңғыстау облысы өңірге Достық үйін салып бермек. Іргетасын қалау рәсіміне Абай облысының әкімі Берік Уәли мен Маңғыстау облысының әкімі Нұрдәулет Қилыбаев бастаған делегация қатысты.
Жаңа мәдени кешен 75 мың тұрғынға арналған «Semey Smart City» шағын ауданында бой көтереді. 3 қабатты ғимаратта кітапхана, қолданбалы өнер мұражайы, фотозертхана, көркемөнер және қалпына келтіру шеберханалары, кинозал мен конференция залдары болады.
Аймақ басшысы Берік Уәли Маңғыстау облысы халқына ризашылығын білдіріп, Достық үйінің екі өңірдің бауырластығын айқындайтынын атап өтті. Маңғыстау облысы делегациясы атынан сөз алған Құрметті азамат Даржок Сейбағытов бұл бастама еліміздің өзге аймақтарына да үлгі болатынын жеткізді.
«Абайға құрмет» акциясы аясында өзге өңірлер де Семейде түрлі нысандар тұрғызуды жоспарлап отыр. Мәселен, Шымкент – шығармашылық орталық, Түркістан облысы – көрме орталығы, Астана – келешек мектебі, Ақтөбе – жекпе-жек орталығы, Павлодар – үстел теннисі орталығы, ал Шығыс Қазақстан облысы Ертіс жағалауын абаттандырмақ.
