Semeytany.kz – Абайдың 180 жылдығына арналған онкүндік аясында Семейдегі Шәкәрім университетінде «Адамзаттың Абайы: руханият, парасат, таным» атты халықаралық ғылыми-тәжірибелік конференция ұйымдастырылды. Шараға Түркия, Нидерланды, Ресей, Қырғызстан, Өзбекстан және еліміздің әр өңірінен абайтанушы, әдебиеттанушы, философ, тарихшы ғалымдар қатысты.
Конференцияның ашылуында облыс әкімі Берік Уәли, ҚР Ғылым және жоғары білім министрі Саясат Нұрбек, түркітанушы Зифа-Алуа Мұратқызы, ЕҰУ ректоры Ерлан Сыдықов құттықтау сөз сөйледі. Аймақ басшысы Абай мұрасын терең зерттеудің ұлттық сана қалыптастырудағы маңызын атап өтті.
Басқосуда Түркиядағы Памуккале университетінің профессоры Нергиз Бираз, Нидерландыдан келген түркітанушы Роберт Эрмерс, сондай-ақ Тұрсын Жұртбай, Арап Еспенбетов және өзге де ғалымдар ғылыми баяндамалар жасады.
Конференция аясында 9 бірдей кітаптың тұсаукесері өтті. Олардың қатарында Кенжехан Матыжанов құрастырған «Абай шығармаларының үш томдық академиялық жинағы», Базарбек Атығайдың «Абайдың аударма мектебі» монографиясы, «Шейіт» жинағы, Ахат Шәкәрімұлының «Жалынға малған жүрегін» кітабы, Әсет Медеуханұлының «Халиолла» хикаяты, Даниял Ысқақовтың шығармалары және AR «Қарасөз» кітабы бар. Бұл туындылар алғаш рет көпшілікке ұсынылды.
