Semeytany.kz – Абайдың 180 жылдығына арналған мерейтойлық онкүндік аясында Семейдегі Абай атындағы облыстық әмбебап кітапханада «Адамзаттың бәрін сүй, бауырым деп…» атты халықаралық поэзия фестивалі өтті.
«ТҮРКСОЙ» халықаралық ұйымы мен Михай Эминеску атындағы Халықаралық поэзия академиясының қолдауымен өткен шарада ұлы ақынның жырлары 15 тілде оқылып, әлемге таныстырылды. Фестивальге Конго, АҚШ, Мексика, Италия, Швеция сынды алыс-жақын шетелдерден келген ақындар мен жазушылар, сондай-ақ Ұлықбек Есдәулет, Светқали Нұржан, Серік Ақсұңқарұлы, Ғалым Жайлыбай, Ханбибі Есенқарақызы, Ақұштап Бақтыгереева, Тыныштықбек Әбдікәкімұлы секілді қазақ әдебиетінің көрнекті өкілдері қатысты.
Ашылу салтанатында ТҮРКСОЙ Бас хатшысы, Қырғызстанның халық жазушысы Сұлтан Раев Абай мұрасының әлемге ортақ құндылық екенін атап өтті. Облыс әкімі аппараты басшысының орынбасары Ербол Алшынбай қатысушыларға аймақ басшысы Берік Уәлидің құттықтауын жеткізді.
Фестиваль аясында «Адамзаттың бәрін сүй бауырым деп» атты дүниежүзілік поэзия антологиясының (қазақ және ағылшын тілдерінде), Ион Диаконескудің «Ол құс – Мен» романының (қазақ тілінде), Ұлықбек Есдәулеттің «Ақыннан сағат сұрама» румын тіліндегі кітабының және Сауытбек Абдрахмановтың «Алып Абай» еңбегінің тұсаукесері өтті.
