Semeytany.kz – Семей қаласында «Абай елінен сарқыт» атты креативті-әлеуметтік кеңістік дүкені ашылды. Бұл жоба ұлттық дәстүр мен заманауи кәсіпкерлікті ұштастырып, жергілікті өнімдерге деген сұранысты арттыруға бағытталған.
Жобаны «ADAL AS Trade» компаниясы мен Абай облысы кәсіпкерлер палатасы бірлесіп жүзеге асыруда. Мұнда өңірде өндірілген экологиялық таза тағамдар, ұлттық нақыштағы кәдесыйлар және қолөнер бұйымдары сатылады.
Компания директоры Раушан Мұқажанованың айтуынша, дүкен – туған жердің табиғи өнімдерін тұтынушыға жеткізетін ерекше орын. «Абай елінен сарқыт» жобасы соңғы үш жылда мемлекеттік грант иегерлерімен тығыз серіктестік орнатып, 50-ге жуық жергілікті кәсіпкердің өнімін тұрақты сатылымға шығарып отыр.
Кеңістіктің басты мақсаты – ауыл мен әлеуметтік кәсіпкерлікті қолдау, ұлттық мәдениетті жаңғырту және жергілікті өнімдерді туристік брендке айналдыру.
Дүкен мекенжайы: Дулатов көшесі, 143.
