Semeitany.kz — Абай облысында биыл бақша өнімдерінен улану фактілері анықталған жоқ. Бұл туралы Өңірлік коммуникациялар қызметіндегі брифингте облыстық санитариялық-эпидемиологиялық бақылау департаментінің бөлім басшысы Айгерим Мусатаева мәлімдеді.
Спикердің айтуынша, 2025 жылдың шілдесінде бақша өнімдерінің қауіпсіздігін бақылау мақсатында 14 түрлі өнімнен сынама алынып, барлығы теріс нәтиже көрсеткен. Зертханалық талдау қорытындысы бойынша өнімдер адам денсаулығына зиянсыз.
Айгерим Мусатаева тұрғындарға бақша өнімдерін тек сертификатталған сауда орындарынан сатып алуға кеңес берді. Кесілген қарбыз бен қауынды алмау қажет. Піскен қарбыз саңырау дыбыс береді, ал қауынның иісі қанық, түсі ашық болуы тиіс. Қабықта жарық, шіру немесе өзге де зақым болса, мұндай өнімді тұтынбаған жөн.
Қарбыз бен қауынды жатар алдында емес, күндіз тұтыну ұсынылады. Ішер алдында сабынмен жуу және қайнаған сумен шаю керек. Қауын жүрек-қан тамырлары жүйесіне пайдалы, ал қарбыз иммунитетті нығайтып, ағзаны токсиндерден тазартуға көмектеседі.
«Тамақ өнімдерін таңдауда мұқият болу – денсаулықты сақтаудың ең қарапайым жолы. Халық денсаулығы – басты құндылық», – деді бөлім басшысы.
