Semeytany.kz — Семей қаласында облыс аумағындағы ең ірі коммуналдық базардың құрылысы ресми түрде басталды. Ашылу рәсіміне Абай облысының әкімі Берік Уәли, Xin Yi Ltd компаниясының бас директоры Сүйінбай Бейсенұлы және компания өкілі Шы Цу Лян қатысты.
Жоба «Семей» әлеуметтік-кәсіпкерлік корпорациясымен серіктестік негізінде іске асады: құрылысын Xin Yi Ltd жүргізіп, дайын нысанды әлеуметтік-кәсіпкерлік корпорацияның пайдалануына береді. Мұнда жергілікті ауыл шаруашылығы өндірушілеріне өз өнімдерін тегін өткізуге арналған орындар қарастырылып, бағаны тұрақтандыруға және қолжетімді азық-түлікпен қамтуға ықпал етеді.
Құрылыс толықтай инвестор есебінен қаржыландырылады. Үш кезеңнен тұратын жобаның әр кезеңіне 5 млрд теңгеден, жалпы 15 млрд теңге бағытталады. Алғашқы кезеңде шамамен 2 мың жұмыс орны ашылса, нысан толық қуатына шыққанда 5 мың адамға дейін жұмыспен қамтылады. Сауда айналымы ұлғайып, шағын және орта бизнеске қосымша мүмкіндіктер туады, өңірдің азық-түлік қауіпсіздігі нығаяды.
Аймақ басшысы Берік Уәли бұл бастама Абай облысының әлеуметтік-экономикалық дамуын жеделдетіп, Қазақстан мен Қытай арасындағы серіктестікті тереңдететінін атап өтті. Оның сөзінше, көктемде ҚХР-дың Алтай қаласындағы «Үлкен Алтай» өңірлік экономикалық конференциясы аясында Xin Yi Ltd компаниясымен келісімге қол қойылған. Серіктестер Семейде бой көтеріп жатқан жаңа әкімшілік-іскерлік орталықта тұрғын үйлер мен қонақүй салуды да жоспарлап, құрылыс жұмыстары басталып кеткен.
Жоба іске қосылғаннан кейін Семей облыс орталығы ретінде сауда-логистикалық хаб ретіндегі әлеуетін күшейтіп, өңірдің сауда инфрақұрылымын жаңғыртады. Кәсіпкерлер үшін қолайлы жағдай жасалып, тұрғындар сапалы тауарды қолжетімді бағамен ала алады.
