Semeytany.kz — Абай облысының әкімі Берік Уәли өңірдегі экобелсенділер Дамир Айдынұлы мен Кербез Айдарбекқызымен жүздесіп, табиғатты қорғауға бағытталған бастамаларды тұрақты қолдайтынын жеткізді. Жастардың еңбегін жоғары бағалап, символикалық марапат табыстады.
Кездесу барысында экологияны сақтау, экотуризмді дамыту, қоғамның экологиялық мәдениетін көтеру жөнінде ұсыныстар талқыланды. Аймақ басшысы белсенді әрекеттердің тек қоқыс жинаудан тыс, құндылық қалыптастыруға ықпал ететінін атап өтіп, алдағы жобаларды бірге іске асыруға дайын екенін айтты.
Мемлекет басшысы Қасым-Жомарт Тоқаевтың бастамасымен жүзеге асып жатқан «Таза Қазақстан» бағдарламасы биыл Абай облысында ерекше қарқын алды: қоғамдық бақылау күшейтіліп, түсіндіру жұмыстары жүргізілуде, ескерту тақтайшалары орнатылып, заңға сай айыппұл салу тәжірибесі кеңейтілуде, бейнебақылау саны артып келеді.
2025 жылдың 5 сәуірінен бері өткен санитарлық-экологиялық акцияларға 227,3 мың адам, 10 275 ұйым және 4114 техника жұмылдырылды. Нәтижесінде 39,3 мың тонна тұрмыстық қалдық шығарылып, 132,6 мың аула, 1939 саябақ пен гүлзар, 1193 ескерткіш тазартылды. Өңірде 57 681 түп ағаш пен көшет отырғызылып, бұл жұмыстар жүйелі түрде жалғасады.
