Semeytany.kz — Президент Қасым-Жомарт Тоқаевтың 2024 жылғы Жолдауындағы тапсырмалар жүйелі түрде орындалып, денсаулық сақтау саласында сапа мен қолжетімділік күшейіп келеді. Негізгі мақсат — қазақстандықтардың өмір сүру ұзақтығын ұзарту және медициналық көмекті тең қолжетімді ету.
МӘМС енгізілгелі саланы қаржыландыру үш есеге ұлғайып, жоғары технологиялық, бағасы қымбат қызметтерге жол ашылды. Енді медициналық көмек екі пакетке нақты бөлінеді: баршаға кепілдік берілген базалық көмек және сақтандырылған азаматтарға арналған кеңейтілген пакет. 2025 жылдың 14 шілдесінде міндетті медициналық сақтандыру жөніндегі жаңа заңға қол қойылып, екі пакеттің ара-жігі айқындалды.
Сақтандыру мәртебесіне қарамастан жиі кездесетін және әлеуметтік маңызы бар ауруларға скринингтер барша азаматқа қолжетімді болады. Онкологиялық және жүрек-қан тамыр ауруларын ерте анықтауға арналған жаңа скрининг түрлері енгізіліп жатыр. Сонымен бірге 50 жастан асқан ер азаматтар үшін ми қанайналымының бұзылуын ерте анықтайтын тексеру қарастырылды. Әлеуметтік маңызы бар ауруға күдік туған жағдайда тексерулер тегін жүргізіледі.
Денсаулық сақтау министрі Ақмарал Әлназарованың айтуынша, 2024 жылдың қорытындысында өмір сүру ұзақтығы алғаш рет 75 жастан асты, ал 2029 жылға дейін бұл көрсеткішті 77 жасқа жеткізу көзделіп отыр. Үкіметтің қолдауы халық денсаулығы индикаторларын тұрақты жақсартуға мүмкіндік беруде.
