Semeytany.kz — Қазақстанда он жылда бір рет өтетін Ұлттық ауыл шаруашылығы санағы Абай облысында басталды. Науқан ФАО-ның Дүниежүзілік бағдарламасына сай жүргізіліп, агросектордың нақты картинасын жасап, алдағы шешімдерге негіз болады.
ӨКҚ алаңында Ұлттық статистика бюросының облыстық департамент басшысы Берік Терлікбаев санақ екі кезеңнен тұратынын айтты: 1–31 тамызда sanaq.gov.kz порталында онлайн сауалнамалар, ал 20 қыркүйектен офлайн қатысу. Оның сөзінше, онлайн толтыру уақытты үнемдеп, деректерді жылдам өңдеуге және мамандар жүктемесін азайтуға мүмкіндік береді.
Аймақта 671-ден астам ауыл шаруашылығы кәсіпорны және шамамен 10 мың шаруа, фермер қожалықтары қамтылады. Қатысушылар үшін екі бөлек сауалнама әзірленген: бірі – ауыл шаруашылығы өндірушілеріне, екіншісі – ауласында бақшасы, жері не малы бар үй шаруашылықтарына арналған. Жиналған мәліметтер қойма салу, субсидиялау сияқты қолдау шараларын жоспарлауда ескеріледі.
Барлық жауаптар құпия сақталады: салық органдарына немесе полицияға берілмейді, тек жиынтық түрде пайдаланылады. Порталда толтыру нұсқаулығы мен бейнеролик бар, тәулік бойы SANAQ мырза чат-боты және 1446 байланыс орталығы жұмыс істейді. Алдын ала нәтижелер биылғы желтоқсанда, түпкілікті қорытындылар 2026 жылы жарияланады.
