Semeytany.kz — Облыс әкімі Берік Уәли Семейдегі нысандарды аралау барысында Семей–Павлодар автожолының бойындағы бақылау алаңын абаттандыруды тапсырды.
Бұл орын тұрғындар мен қала қонақтары жиі аялдайтын жер болғандықтан, жуырдағы экобелсенділермен кездесу кезінде көтерілген дәретхана мен қоқыс жәшіктерінің жетіспеуі мәселесі назарға алынды.
Жоспар бойынша алаңға санитарлық-гигиеналық тораптар, қоқыс жәшіктері, демалыс орындықтары және жарықтандыру жүйесі орнатылады. Әкім Семей қаласы әкімінің м.а. Бекжан Бапышевқа аумақты кеңейту жобасын әзірлеуді жүктеп, қоршаулар орнату, Көктөбедегідей қаланы тамашалайтын дүрбілер мен патриоттық шағын сәулеттік формаларды қою, сондай-ақ кәсіпкерлерді тартып, шағын сауда орындарын ашу мүмкіндіктерін қарастыруды тапсырды.
Жоба қоғамдық кеңістікті жаңғыртып, қала маңындағы демалыс орнының тазалығы мен жайлылығын арттыруға бағытталған.
