Semeitany.kz – Семей қаласында биыл қаңтар–шілде аралығында ішек инфекциясының 287 жағдайы тіркелді. Бұл туралы Өңірлік коммуникациялар қызметінде өткен брифингте Абай облысы СЭБД Семей қалалық басқармасының басшысы Шыңғыс Чокушев мәлімдеді.
Спикердің айтуынша, жағдайлардың басым бөлігі – жекелеген оқиғалар. Қала мектептері мен балабақша асханаларында топтық улану фактілері тіркелмеген. Дегенмен жазда ауа температурасының жоғарылауы, микроорганизмдердің жылдам көбеюі және бақша дақылдарының пісуі салдарынан тамақтан улану қаупі артады. Көкөніс пен жемісті жумай жеу, тағамды дұрыс өңдемеу балалар мен ересектер арасында инфекцияның көбеюіне әкелуі мүмкін.
Мамандар білім беру ұйымдарының асханалары мен қоғамдық тамақтану орындарына бақылауды күшейткен. Жыл басынан бері құс өнімдері мен кремді тағамдар дайындайтын кәсіпкерлерге арналған 3 семинар, базарларда «Тамақтан уланудың алдын алу» тақырыбында 6 акция ұйымдастырылған. Сауда нүктелерінде 400-ден астам көрнекі құрал таратылып, өнімдер зертханалық сараптамадан өткізілді.
— Тексеру барысында кейбір тағамдардың сақтау шарттары талапқа сай еместігі анықталды. Бұл тағам арқылы жұғатын аурулардың негізгі көзі болып табылады, — деді басқарманың жетекші маманы Дана Төленді.
