Semeytany.kz — Облыс әкімі Берік Уәли Жаңасемей ауданының Талица ауылындағы жалпы негізгі білім беретін мектептің жағдайымен танысты. Кездесу барысында мектеп ұжымы мен тұрғындар оқу орнының инфрақұрылымын жаңарту және жаңа ғимарат салу қажеттігін айтты.
Мектеп 1974 жылы жатақхана ретінде салынған екі қабатты бейімделген ғимаратта жұмыс істеп тұр. Қазір 95 оқушы білім алады, ал алдағы бес жылда бұл көрсеткіш 125-ке дейін өсуі мүмкін. Соған байланысты оқу кабинеттерін көбейту, спорт нысандарын талапқа сай ету өзекті. 2023 жылы мұржалар мен электр жүйесі жөнделіп, бейнебақылау орнатылған. 2024 жылы қазандықтың шатырына ағымдағы жөндеу жасалды. Оқу ордсында 24 педагог (соның ішінде 4 педагог-зерттеуші, 7 педагог-сарапшы, 8 педагог-модератор және 1 жас маман) және 7 техникалық қызметкер еңбек етеді. Қазіргі спорт залы жертөледе орналасқан.
Тұрғындар 100 орындық жаңа мектеп салу жөніндегі өтінішін жеткізіп, интернет сапасын жақсарту, фельдшерлік пункт ашу, көше жарығын орнату, ауыз сумен қамту және Семейге қатынайтын автобусты іске қосу мәселелерін көтерді. Берік Уәли аудан әкімдігіне жаңа мектеп құрылысына қатысты ұсыныс әзірлеуді тапсырды. Облыс әкімі интернет мәселесі келесі жылы шешілетінін, ауылға ауыз су жыл соңына дейін тартылатынын айтты. Каштак, Половинка сияқты елді мекендерді қамтитын бір бағыттағы қоғамдық көлік қатынасы ұйымдастырылмақ. Көше жарығы мен фельдшерлік пункт салу секілді жұмыстар кезең-кезеңімен орындалады.
