Semeitany.kz — Абай облысында 2025–2026 оқу жылына дайындық кешенді жүргізіліп жатыр. Бұл туралы Өңірлік коммуникациялар қызметіндегі брифингте облыстық білім басқармасы басшысының орынбасары Дәулет Илиясов мәлім етті. Оның сөзінше, өңір жаңа жылды жаңартылған мектептермен, заманауи кабинеттермен, қауіпсіздік жүйелерімен және жылытуға толық дайындықпен қарсы алады. Облыста үш ауысыммен оқытатын мектеп жоқ.
«Реновация» бағдарламасы шеңберінде 2025–2027 жылдары 75 мектеп кезең-кезеңімен жаңғыртылады. Биылдың өзінде сегіз білім ұйымы толық жөндеуден өтіп, жаңа оқу жылына дайын болады. Оның ішінде Семейдегі №32 мектеп, Жаңасемей аумағындағы Түрксіб және Приречное мектептері, Аягөздегі №7 орта мектеп пен Қ.Қадыржанов атындағы мектеп, Бесқарағайдағы Глуховка, Үржар ауданындағы Б.Момышұлы мектептері сияқты оқу орындары бар. Жөндеудің басым бөлігі 1 қыркүйекке дейін аяқталады.
«Келешек мектептері» ұлттық жобасы аясында екі жаңа мектеп оқушыларды қабылдауға әзір: Семей қаласының Водный кентіндегі мектеп 1 қыркүйекте ашылады. Аягөз қаласында 600 орындық жаңа мектеп екінші тоқсанда пайдалануға беріледі. Бұған қоса, Семейдің Шығыс Оң кентінде 300 орындық мектеп құрылысы жалғасуда.
Қуаттылықты арттыру бойынша жалпы 8200 орын тапшылығының 31 пайызы аталған жоба бойынша салынып жатқан бес мектеп есебінен өтелмек. Қалған қажеттілікті жабу үшін алдағы үш жылда республикалық бюджет қаражатына 11 мектеп салу жоспарланған. Апатты деп танылған үш мектептің мәселесі де реттеліп келеді: Жарма ауданында 100 орындық жаңа мектептің құрылысы басталды, Ақсуат ауданы Екпін ауылындағы 300 орындық мектептің жобалық-сметалық құжаттамасы сараптамада, Семейдегі №11 мектептің орнына жаңа нысан салуға құжат дайындалып жатыр.
Инфрақұрылымды нығайту үшін биыл 12 мектепке күрделі жөндеуге 2 млрд 900 млн теңге бөлінді, оның бесеуі «Ауыл – ел бесігі» аясында. Сонымен бірге 174 мектепте ағымдағы жөндеу жүргізілді. Оқу сапасын көтеру мақсатында 75 мектепке 130 жаңа кабинет алынды: 17 — физика, 20 — химия, 22 — биология, 20 — STEM, 10 — робототехника, 41 — басқа бағыттар. Барлық мектеп 100 пайыз бейнебақылаумен жабдықталып, жедел басқару орталықтарына қосылған.
