Semeytany.kz – Облыс әкімі Берік Уәлидің төрағалығымен өткен әкімдік отырысында бюджет қаражаты есебінен салынып жатқан нысандар мен жолдардың сапасы талқыланды. Отырыста облыстық мемлекеттік сәулет-құрылыс бақылау басқармасының басшысы Сайлауғалы Байназаров және Жолаушылар көлігі және автомобиль жолдары басқармасы басшысының орынбасары Ерлан Уәлиев баяндама жасады.
Тамыз айының басынан бері мемлекеттік сәулет-құрылыс бақылау басқармасы өңір бойынша жоспарлы мониторинг жүргізіп келеді. Тексеру жұмыстары облыс әкімінің тапсырмасына және ҚР Ұлттық экономика министрлігінің бұйрығына сай ұйымдастырылған. Қорытындысына сәйкес, 9 аудандағы 83 нысан қамтылды: 52-сі – жаңа құрылыс, 18-і – күрделі жөндеу, 6-ауы – қайта жаңғырту, 7-еуі – орташа жөндеу.
Тексерілген нысандардың басым бөлігінде бастапқы құжаттардың толық болмауы, еңбекті қорғауға қатысты бұйрықтардың болмауы, сондай-ақ құрылыс технологияларының сақталмауы сияқты заңбұзушылықтар анықталды. Мониторинг өңірге ортақ мәселені де айқындады: білікті мамандар тапшылығы. Мемлекеттік тапсырыс беруші органдарда жобалық-сметалық құжаттаманы мұқият қарап, сапалы қабылдайтын мамандар жетіспегендіктен, жобаларға құрылыс барысында жиі өзгеріс енгізіледі. Құқықбұзушылықтар тұрғын үй, білім беру, денсаулық сақтау нысандарында және инженерлік инфрақұрылым жобаларында да тіркелген.
Берік Уәли бірінші орынбасары Ербол Садырға және салаға жауапты орынбасары Серік Төленбергеновке құрылыс пен жол сапасына бақылауды күшейтуді, жұмыс кестесін және құрылыс-монтаждау нормаларын өрескел бұзған бас мердігерлермен келісімшарттарды тоқтатуды тапсырды. Сондай-ақ нысандардағы нормативтерді, сапаны және кестенің орындалуын тұрақты бақылауға алуды жүктеді.
«Үкіметтің кеңейтілген отырысында Президент Қасым-Жомарт Тоқаев құрылыс сапасына бақылауды күшейту керегін айтты. Азаматтардың қауіпсіздігі – басты міндет. Бюджет қаржысын тиімді игеруіміз қажет. Сондықтан жауапсыз мердігерлерге заң аясында нақты талап қоямыз. Бюджет есебінен жүргізіліп жатқан барлық нысан біздің тұрақты бақылауымызда болады», – деді аймақ басшысы.
