Semeitany.kz — Бүгін облыс әкімі Берік Уәлидің төрағалығымен өткен әкімдік отырысында 2025–2026 жылғы жылыту маусымына әзірлік, жаңа оқу жылына дайындық тапсырмаларының орындалуы, бюджет есебінен салынған нысандар мен жолдардың сапасы, әлеуметтік-экономикалық даму, бюджеттің атқарылуы және ұлттық ауыл шаруашылығы санағы талқыланды. Жиынға облыстық басқарма басшылары, аудан-қала әкімдері мен өңірлік департамент жетекшілері қатысты.
Алғашқы мәселе бойынша Энергетика және тұрғын үй-коммуналдық шаруашылығы басқармасының басшысы Раджан Сейтқанов және Семей қаласы әкімінің міндетін атқарушы Бекжан Бапышев баяндама жасады. Берілген мәліметке сай, биыл өңірдің 3 қаласы мен 5 ауданында жалпы 11 млрд 800 млн теңгеге 23 жылу көзі мен 24 шақырым жылу желісін жаңғырту және жөндеу жұмыстары жүріп жатыр. Қаржы Үкімет резервінен, облыстық және республикалық бюджеттен, сондай-ақ Ұлттық қордан бөлінген.
Семей қаласында ЖЭО-1 және 21 қазандықта жөндеу жүргізілуде. Жоспарға сәйкес 13 жылу көзі мен 4,2 шақырым жылу желісі қалпына келтіріледі. Жарма ауданындағы «Солнечная» қазандығына жаңа қазандықтар қойылып, Шуақ ауылындағы қондырғыларға жөндеу жасалуда. Аягөз қаласының орталық қазандығына қуаты жоғары жабдықтар орнатылып, қала ішінде 5,2 шақырым жылу желісі жаңартылуда. Курчатов қаласында 4 жылу көзін жаңғырту жоспарланған.
Әлеуметтік нысандар бойынша облыс аумағындағы 330 автономды қазандықты жөндеуге қаржы қарастырылған. Бұл білім беру, денсаулық сақтау және әлеуметтік қорғау салаларындағы мекемелерді қамтиды. Жиында Курчатов қаласы, Бородулиха, Жарма және Аягөз аудандарының әкімдері жылумен қамту дайындығы туралы есеп берді.
Отырыс қорытындысында аймақ басшысы алдағы маусымға әзірлікті күшейтуге нақты тапсырмалар жүктеді: қала-аудан әкімдері өз аумақтарындағы барлық әлеуметтік және тұрғын үй нысандарын қатаң бақылауға алуы тиіс; бюджеттік ұйымдарға көмірді 15 қыркүйекке дейін толық жеткізу, тұрғындарға қазан айының басына дейін отын қорын жасақтау қажеттігін түсіндіру тапсырылды. Жылыту маусымы кезеңінде аудан және қала әкімдіктерінде тәулік бойы жұмыс істейтін Call-орталықтар ашылмақ.
«Синоптиктердің болжамы бойынша, биыл шығыста қыс ерте түсіп, аяз қатты болады. Премьер-Министрдің кеңесшісі Ермек Маржықпаев дайындық барысын бақылап кетті, Президент Әкімшілігі де мәселені назарда ұстап отыр. Сондықтан жылу мәселесіне айрықша мән береміз», – деді Берік Уәли.
