Semeytany.kz – Облыс әкімі Берік Уәли Көлденең ауылындағы «Юбилейный» шаруа қожалығының жұмысымен танысып, ұжыммен және ауыл тұрғындарымен кездесті. Сапар барысында егіншілік пен мал шаруашылығының жағдайы, техника паркі және әлеуметтік жобалар сөз болды.
1996 жылы құрылған қожалықта бүгінгі таңда 100-ге жуық адам еңбек етеді. Жер көлемі – 17 387 гектар: соның 5 мыңы – егістік, 602 гектары – шабындық, 11 785 гектары – жайылым. Егістікте бидай, арпа, сұлы, күнбағыс және көпжылдық шөптер өсіріледі.
Мал шаруашылығы да қарқынды дамуда: серіктестік балансында 752 бас мал бар (40 ірі қара, 500 жылқы, 200 қой-ешкі, 12 түйе). Қожалықтың техника паркі 60 бірліктен тұрады: 30 трактор, 6 комбайн, «Джуля» себу кешені, тұман бүріккіші, «АГС» топырақ тегістегіштері, «Макино» сығымдағыштары және өзге де ауыл шаруашылығы жабдықтары.
Шаруа қожалығының басшысы Мамырбек Қарашев ауылдың әлеуметтік дамуына тұрақты қолдау көрсетіп келеді: жеке қаржысына ауылдық клуб, мешіт және қатымхана салып, пайдалануға берген. Сонымен қатар кәсіпорын қызметкерлерінің әлеуметтік жағдайына ерекше көңіл бөлінеді.
Аймақ басшысы ірі шаруашылықтардың өңір ауыл шаруашылығын дамытудағы үлесін атап, әкімдік тарапынан жан-жақты қолдау көрсетілетінін жеткізді. Оның айтуынша, бір мезетте өндірісті ілгерілетіп, ауыл инфрақұрылымын жақсартуға күш салатын үлгілі қожалықтар өңірдің өркендеуіне тікелей ықпал етеді.
