Semeytany.kz – Абай облысының әкімі Берік Уәли Үржар ауданына қарасты Ақжар ауылына барып, жол жөндеу жұмыстарының барысын көрді және тұрғындармен кездесті.
Үш елді мекеннен тұратын Ақжар ауылында екі мыңнан аса адам тұрады, аудан орталығынан 4 шақырым қашықта орналасқан. Мұнда жалпы ұзындығы 10 шақырымнан асатын 11 көше бар, оның 6-ына асфальт төселген. Биыл 3,9 шақырым болатын 5 көше орташа жөндеуден өтті, қазір асфальт төселген көшелердің жиектерін бекіту жұмыстары жүргізіліп жатыр. Жөндеу сапасын бақылау үшін «Жол активтері сапасының ұлттық орталығы» РМК-мен келісімшарт жасалып, тиісті тексерулер басталды. Аяқтау мерзімі – қыркүйек айының соңы.
Кездесуде ауыл тұрғындары атқарылған іске ризашылық білдірді. Ауыл ақсақалы Жұман Жыңғылбаев жолдың сапасы ойдағыдай екенін айтып, алғысын жеткізді.
Аймақ басшысының айтуынша, биыл облыс бойынша 358 шақырым жол жөнделуде. Үржар ауданында Жоғарғы Егінсу, Жанай, Ақжар, Жаңа Тілек және Қарақол ауылдарының көшелері орташа жөндеуден өтуде. Ақжар – ауданның ірі елді мекендерінің бірі, негізгі көшелеріне асфальт төселді. Келесі жылы ауылға сапалы интернет жеткізу жоспарланып отыр. Аудан елді мекендерінің инфрақұрылымы кезең-кезеңімен жаңартылады.
