Semeitany.kz — Конституция күні қарсаңында Ақсуат ауданының Екпін ауылында дәрігерлік амбулатория, Көктүбек елді мекенінде медициналық пункт іске қосылып, тұрғындарға қызмет көрсетуді бастады.
Ашылу рәсіміне аудан әкімі Ерсін Ескендіров қатысып, соңғы жылдары ауданда атқарылған жұмыстарға тоқталды. Оның айтуынша, «Ауылдық денсаулық сақтауды жаңғырту» ұлттық жобасы аясында Ақсуат ауданында барлығы 9 нысан салынды.
Атап айтқанда, Үштөбе мен Екпінде дәрігерлік амбулаториялар, Кіндікте фельдшерлік-акушерлік пункт, Қызылжұлдыз, Көктүбек, Сұлутал, Айнабастау, Аққала және Қожакелді ауылдарында медициналық пункттер бой көтерді.
Заманауи құрал-жабдықпен қамтылған Екпін ауылдық амбулаториясында 1 дәрігер, 5 орта буын медицина қызметкері және 3 кіші қызметкер жұмыс істейді. Көктүбек ауылдық медициналық пунктінде 1 фельдшер мен 1 санитар халыққа алғашқы көмек көрсетеді.
Қазір жаңа нысандар толық пайдалануға берілді. Аудан бойынша бастапқы медициналық-санитариялық көмек қолжетімділігі артып, ауыл тұрғындарының емханалық қызметтерге жүгіну уақыты қысқарады деп күтіледі.
