Semeytany.kz — Шәкен Айманов атындағы «Қазақфильм» ұлттық киностудиясының қарамағындағы «Көшпенділер қаласы» декорациялық кешені сыйға беру шартымен Қонаев қаласының меншігіне берілді. Бұо туралы қала әкімдігі хабарлады.
Кешеннің аумағы 5,8 гектар, Іле өзенінің сол жағалауында орналасқан. Баланстық құны 15,4 млн теңге. Әкімдік дерегінше, пайдалану жылдары ішінде нысан әжептәуір ескіріп, кейбір құрылыстар жарамсыз күйге түскен, бастапқы келбетінің бірқатар элементтері жоғалған.
Енді қалашық қалалық ТҮКШ бөліміне қарасты болады. Билік оны туризм бағытымен дамытуды, нысанды күтіп ұстау мен жөндеуге бюджеттен қаржы қарастыруды жоспарлап отыр.
Қалашыққа баратын шамамен 7 шақырымдық күре жолдың құрылысы жүріп жатыр. Жоба аясында қосымша электр желілері тартылып, автотұрақ салынып, жол бойы жарықтандырылады. Құрылыс жұмыстарына 41 адам және 24 техника тартылған.
