Semeytany.kz — Бейжіңде өткен Қазақстан-Қытай іскерлік кеңесінің VIII отырысы аясында Абай облысының әкімдігі мен қытайлық Xinjiang Xinhua Industrial Company Семей қаласында жаңа тұрғын үй кварталын салу жөнінде келісім жасасты.
Құжатқа Абай облысы әкімінің бірінші орынбасары Ербол Садыр және компания өкілі Ши Цунлян қол қойды. Жоба Семейдің жаңа ауданында заманауи тұрғын үйлермен қатар қонақүй мен мектептер салуды қамтиды, қалалық орта халықаралық стандарттарға сай қалыптастырылмақ.
Ербол Садырдың айтуынша, бастама 150 гектар аумақты қамтиды, инвестиция көлемі 106,8 млрд теңгені құрайды. Ол бұл келісім құрылыс саласын жандандырып, жаңа жұмыс орындарын ашуға әрі әлеуметтік инфрақұрылымды жаңа деңгейге көтеруге серпін беретінін атап өтті.
Келісімге қол қоюға негіз болған маңызды қадам — 20 мамырда Семейде облыс әкімі Берік Уәлидің бастамасымен өткен «Туған жерге туыңды тік» инвестициялық форумы. Сондай-ақ бұл — Xinjiang Xinhua Industrial Company-дің өңірдегі екінші жобасы: компания осы форумнан кейін Семейде сауда-логистикалық орталықтың құрылысын бастаған болатын.
