Semeytany.kz — Абай облысы Полиция департаментінің Киберқылмысқа қарсы іс-қимыл басқармасы «дроп» (дроппер) схемаларына қатысудың қатаң жазаланатынын хабарлады. Қылмыстық кодекстің 232-бабына сәйкес интернет-алаяқтыққа көмектескен тұлға 7 жылға дейін бас бостандығынан айырылуы мүмкін, деп мәлімдеді басқарма өкілі, полиция аға лейтенанты Ерназ Тұрлыбеков.
Дроптар — банк картасы мен шоттарын үшінші тұлғаларға заңсыз пайдалануға беретіндер. Алаяқтар көбіне жұмыссыздар, студенттер, зейнеткерлер, үй шаруасындағы әйелдер секілді осал топтарды «жылдам табыс» уәдемен тартады.
Полицияның түсіндіруінше, картаны немесе шотты беру – 3 жылға дейін, ақша аударымдарын жасау – 5 жылға дейін, мұндай әрекетті ұйымдастыру – 7 жылға дейін бас бостандығынан айыру жазасына әкелуі мүмкін. Қоса алғанда 12 млн теңгеге дейін айыппұл, мүлкін тәркілеу немесе қоғамдық жұмыстар тағайындалады.
Құқық қорғаушылар «ақша шешуге адам керек», «жедел карта ашсаң – сыйақы береміз», «ақшаны алып, ары қарай жіберсең болды» деген ұсыныстар алаяқтыққа қатысу екенін ескертеді. Азаматтарға өз картасы мен шотын ешкімге бермеу, интернеттегі күмәнді хабарламаларға келіспеу ұсынылады. Егер дроппер болып қалғаныңызды түсінсеңіз, ерікті түрде полицияға жүгініңіз: алғаш хабарлап, тергеуге көмектескендер жазадан босатылуы мүмкін.
