Semeytany.kz — Облыс әкімі Берік Уәли Семейдегі облыстық жедел медициналық жәрдем станциясының жұмысымен танысып, ұжыммен кездесті. Сапар қорытындысында мекемеге HYUNDAI Santa FE маркалы қызметтік автокөліктің кілтін табыстады.
Станция ересектер мен балаларға өмірге қауіп төндіретін жағдайларда алғашқы медициналық көмек көрсетеді, медициналық авиация арқылы кеңес беру, жоспарлы және шұғыл көмек ұйымдастырады. Нысан тәулігіне 1000-ға дейін шақырту қабылдайды. Мұнда 872 медицина қызметкері еңбек етеді. Бас корпус «Саламатты Қазақстан» мемлекеттік бағдарламасы аясында 2015 жылы ашылған.
Абай облысының жедел жәрдем қызметі Семейдің оң және сол жағалауындағы екі қосалқы станциядан, сондай-ақ Абай, Аягөз, Бесқарағай, Бородулиха, Жарма, Үржар, Мақаншы, Көкпекті, Ақсуат аудандары мен Курчатов қаласындағы 18 бөлімшеден тұрады.
Кездесу барысында бірқатар инфрақұрылымдық мәселе көтерілді: шаруашылық блок пен гаражға күрделі жөндеу қажет, автопаркті толық жаңарту керек, қаланың сол жағалауындағы Әуезов қосалқы станциясы ескірген. Мекеме бас дәрігері Владимир Ли осы түйткілдерді шешуге қолдау сұрады.
Аймақтың тумасы Руслан Саметеев Абайдың 180 жылдығына орай станцияға құны 25 млн теңге болатын сервер жүйесін және әрқайсысы 1 млн теңгеден 10 ЭКГ құрылғысын сыйға тартты. Облыс әкімі туған жерін қолдаған азаматқа алғыс білдіріп, саланың материалдық-техникалық базасын кезең-кезеңімен жаңғырту жалғасатынын айтты.
«Жедел медициналық жәрдем станциясы – қаламыздағы ең ірі орталықтардың бірі. Мұндағы мамандар тәулік бойы халыққа қызмет етеді. Сол себепті заманауи талаптарға сай жабдықталуы тиіс. Бүгін көтерілген мәселелердің барлығын білемін. Назарымда ұстаймын. Түйткілді мәселелердің шешу жолдарын қарастырамыз. Жергілікті әкімдік тарапынан тиісті қолдау көрсетеміз», – деді Берік Уәли.
