Semeytany.kz — Облыс әкімі Берік Уәли Семейдегі бірқатар нысандарды аралап, «Келешек мектептері» аясында Шығыс кентінде салынып жатқан 300 орындық мектепке инженерлік инфрақұрылым тарту барысын қадағалады.
Қазір нысанда су құбыры желілерін жүргізу қарқынды жүріп жатыр. Қажетті материалдар толық жеткізілген, құрылыс-монтаж жұмысы тамызда басталған. Семей қаласы әкімінің міндетін атқарушы Бекжан Бапышевтың мәліметінше, жалпы 2,5 шақырым су желісі төселеді, оның 800 метрі орындалды. Су тарту жұмыстары қазан айының соңына дейін аяқталуы жоспарланған.
Аймақ басшысы мердігерге сапаны қатаң сақтап, жұмысты белгіленген мерзімде бітіруді тапсырды. Сондай-ақ жауапты басқармаларға құрылыс барысын тұрақты бақылауда ұстау міндеттелді. «Шығыс кентіндегі 300 орындық мектеп — қала үшін маңызды әлеуметтік жоба. Бұл аумақта бұған дейін сапалы ауыз су болмаған. Тартылып жатқан желілер мектеппен қатар маңайдағы тұрғындарды да таза сумен қамтуға мүмкіндік береді. Келесі жылы мектепке дейінгі көшеге асфальт төселіп, жарық тартуды жоспарлап отырмыз. Ең бастысы — жұмысты уақытылы әрі сапалы орындау», — деді облыс әкімі.
Мемлекет басшысының бастамасымен жүзеге асырылып отырған «Келешек мектептері» ұлттық жобасы аясында өңірде екі мектеп салынып жатыр. Аягөз қаласындағы 600 орындық мектеп 2-інші тоқсанда пайдалануға берілмек. Биыл осы жоба бойынша облыста үш мектеп іске қосылды.
