Semeytany.kz — Абай облысында туризмді дамыту жөніндегі кеңесте аймақ басшысы Берік Уәли Алакөлдегі келесі шомылу маусымына әзірлікті қазірден бастап, биыл байқалған кемшіліктерді 2026 жылы мүлде қайталамауға тапсырма берді.
Отырыста 2025–2027 жылдарға арналған жол картасын әзірлеу, Алакөл жағалауының бас жоспары, инфрақұрылымды жаңғырту және туризмде цифрлық технологияларды қолдану мәселелері қаралды. Туризм, сәулет және қала құрылысы, жер қатынастары, энергетика және ТКШ, құрылыс пен цифрлық технологиялар басқармалары баяндама жасады.
Биыл Алакөл инфрақұрылымын жақсарту аясында облыстық бюджеттен 658 млн теңге бөлініп, 2018 жылдан бері жөнделмеген жағалау абаттандырылды: Арбат алаңы жаңартылды, 25 киім ауыстыратын орын, 50 контейнер, 2 биодәретхана және 3 заманауи дәретхана орнатылды, 7 пирстің үшеуі пайдалануға берілді. Жаңа қоғамдық кеңістік құрылысы аяқталды.
Жиында жағалауды нығайту, электр желісін тарту, қоқыс полигонын салу, құтқарушылар мен полиция қызметін күшейту, қосымша санитарлық тораптар мен автотұрақтар орнату қажеттігі аталды. «Туризм – экономиканың маңызды бағыты. Алакөл – өңірдің басты туристік тартым орталығы. Жүйелі жоспар мен тиімді бақылау арқылы дайындықты қазірден бастауымыз қажет», – деді Берік Уәли.
Кеңес қорытындысында облыс әкімі жауапты орынбасарлар мен басқарма басшыларына бірқатар нақты тапсырма жүктеді: Алакөл жағалауында жұмыс тобын құрып, 2026 жылғы маусымға дайындық алгоритмін әзірлеу; көлді күтіп-ұстауға қажетті қаражатты алдын ала жоспарлау; жағалауда туристік индустриялық аймақ қалыптастыру; озық халықаралық тәжірибені ескере отырып, құтқару кемелері мен қызметкерлер санын көбейту туралы ұсыныс енгізу.
