Semeytany.kz — Білім беруді цифрландыру міндеттеріне сай Абай облысындағы 40 ауылдық мектепке TopIQ-Mobil Box мобильді станциялары беріледі.
Кездесу барысында «Алматыкітап» баспасының президенті Гаухар Саймасаева облыс әкімі Берік Уәлиге аталған мекеменің құрылтайшысы Элеонора Баталованың атынан мобильді станциялардың сертификатын табыстады.
TopIQ-Mobil Box — интернетке қосылып, TopIQ.kz және өзге де білім ресурстарын пайдалануға мүмкіндік беретін заманауи құрылғы. Станция автономды жұмыс істейді, батареясы 6 сағатқа дейін шыдайды, сыныптан сыныпқа еркін көшіріледі. Бұл әсіресе интернеті шектеулі ауыл мектептері үшін қолайлы шешім саналады.
Жобаның маңызды бөлігі — Qamqor жасанды интеллект көмекшісі. Ол электронды оқулықтармен біріктіріліп, оқушыларға күрделі ұғымдарды түсіндіруге, мұғалімдерге оқу материалдарын, тест пен тапсырмаларды әзірлеуге жәрдемдеседі. Өткен оқу жылындағы пилот кезінде жүйе әдебиет, информатика, алгебра және биология сабақтарында өз тиімділігін көрсетіп, мұғалімдер оқушылардың пәнге қызығушылығы артқанын және өздігінен дайындалуға ынталанғанын атап өтті.
Алдағы уақытта «Алматыкітап баспасы» республика бойынша 1000 TopIQ-Mobil Box станциясын тегін таратуды жоспарлап отыр. Құрылғылар ауыл мектептеріне, TopIQ.kz платформасын белсенді қолданатын ұйымдарға және LiderTopIQ.kz байқауына қатысушы оқу орындарына ұсынылады. Жоба өңір мектептерінің материалдық-техникалық базасын жаңғыртып, білім сапасын арттыруға және цифрлық білім беру кеңістігін дамытуға серпін береді.
