Semeytany.kz – Жапонияда жаңадан құрылған «Жаңғыру жолы» (Path to Rebirth) партиясы жетекшілік қызметті жасанды интеллектке жүктейтінін мәлімдеді. Мұндай шешім партияның негізін қалаушы, батыс Жапониядағы шағын қаланың бұрынғы әкімі Синдзи Исимару сайлауда сәтсіздікке ұшырап, ұйымнан кеткеннен кейін қабылданды.
Партияны қаңтар айында құрған Исимару 2024 жылғы Токио губернаторы сайлауында күтпеген жерден екінші орын алған еді. Алайда биыл маусымдағы Токио ассамблеясы сайлауында ұсынған 42 үміткердің, ал шілдеде Жоғарғы палатаға түскен 10 үміткердің бәрі жеңіліп қалды.
«Жаңа жетекші – жасанды интеллект болады», – деді Киото университетінің 25 жастағы докторанты Коки Окумура баспасөз жиынында. Ол өзін «жаңа жетекшінің көмекшісі» ретінде таныстырып, ЖИ партия мүшелеріне саясат жүргізуді бұйырмайтынын, негізінен ішкі ресурстарды – қаржы мен қолдауды бөлу сияқты шешімдерге жауап беретінін айтты. ЖИ-ды қашан және қалай енгізу жайы әлі нақтыланбаған.
«Жаңғыру жолы» нақты бірыңғай бағдарламасы жоқ партия ретінде әр мүшесіне өз саяси жоспарын дербес құруға мүмкіндік береді. Қозғалыс қоғам назарын аударғанымен, әзірге өкілдікке қол жеткізе алмады.
Дереккөз: The Japan Times, Channel NewsAsia.
