Semeytany.kz — Абай облысында 79 жоба әзірленіп, оның 33-і даму жоспарына сай кезең-кезеңімен іске асады. Бұл туралы Өңірлік коммуникациялар қызметінде өткен брифингте облыстық құрылыс басқармасының басшысы Шыңғыс Риаханов мәлімдеді.
Спикердің айтуынша, Семейде 200 орындық балалар ауруханасы мен ядролық медицина орталығының хирургиялық корпусы салынады. Сондай-ақ қан орталығы, екі емхана және «Ұшақтар» ықшамауданында 300 төсек-орындық көпсалалы аурухананың жобасы дайындалып жатыр.
Спорт инфрақұрылымы бойынша Семейде 25 мың орындық стадион тұрғызу жоспарланған, ауылдарда бірқатар спорт кешендері бой көтермек. Білім беру саласында Үржарда 240 орындық балабақша, Қарауылда интернат, Ақтоғайда балабақша салу көзделген. Мәдениет бағытында Үржарда жаңа Мәдениет сарайы және бірнеше ауылдық клубтың жобасы әзірленуде. Әлеуметтік қолдау шеңберінде Семейде балаларға арналған психоневрологиялық мекеме, Аягөзде ерекше күтімді қажет ететін балаларға арналған оңалту орталығы ашылмақ. Қауіпсіздік және азаматтық қорғау саласында өрт сөндіру депосы, тергеу изоляторы мен полиция ғимараттарын салу жоспарға енгізілген.
Инфрақұрылымды дамыту аясында жалпы 36 жоба қолға алынған. Жыл басынан бері құрылыс басқармасы 14 жобаның құжаттамасын аяқтап, мемлекеттік сараптамадан оң қорытынды алған. Олардың ішінде Семейде салынатын 400 орындық «Білім-инновация» лицейі, шаңғы-роллер трассасы және ауылдардағы спорттық-мәдени нысандар бар, деді Шыңғыс Риаханов.
