Semeytany.kz — ҚР Еңбек және халықты әлеуметтік қорғау министрлігінің дерегінше, 2025 жылдың басынан бері көпбалалы отбасылар мен наградталған аналарға орта есеппен 855 мың отбасыға жалпы 404,3 млрд теңге көлемінде төлем жасалды. Оның ішінде көпбалалы отбасыларға — 612 мың отбасыға 352,2 млрд теңге, ал «Алтын/Күміс алқа» иелері және өзге де наградталған аналарға — 243 мың адамға 52,1 млрд теңге бағытталған.
Тамыз айының өзінде аталған жәрдемақылармен 846,8 мың отбасы қамтылып, жалпы 49,8 млрд теңге төленді: көпбалалы отбасылар — 602,3 мың отбасыға 43,3 млрд теңге; наградталған аналар — 244,5 мың адамға 6,5 млрд теңге.
Көпбалалы отбасыға берілетін мемлекеттік жәрдемақы табысқа қарамай тағайындалады. Оған 4 және одан да көп бірге тұратын кәмелетке толмаған баласы немесе күндізгі бөлімде оқитын 23 жасқа дейінгі студент балалары бар отбасылар үміткер бола алады. 2025 жылы төлем мөлшері бала санына қарай былайша есептеледі:
- 4 бала — 16,03 АЕК (63 030 тг);
- 5 бала — 20,04 АЕК (78 798 тг);
- 6 бала — 24,05 АЕК (94 565 тг);
- 7 бала — 28,06 АЕК (110 332 тг);
- 8 және одан көп бала — әр балаға 4 АЕК (15 728 тг).
Наградталған анаға берілетін жәрдемақы «Алтын алқа», «Күміс алқа» иелеріне, бұрын «Батыр ана» атағын алғандарға және І, ІІ дәрежелі «Ана даңқы» ордендерімен наградталған аналарға төленеді. Ай сайынғы мөлшері:
- «Күміс алқа» — 6,40 АЕК (25 165 тг);
- «Алтын алқа», «Батыр ана», «Ана даңқы» І/ІІ дәреже — 7,40 АЕК (29 097 тг).
Айта кетейік, 2025 жылғы 1 қаңтардан бастап балалы отбасыларға тағайындалатын мемлекеттік жәрдемақылар 6,5%-ға ұлғайған.
