Semeytany.kz – Бесқарағай ауданының «Мукинов» шаруа қожалығына тиесілі Байторы және Шойынқара жылқылары республикалық IV ат көрмесінде бірінші орын иеленді.
Аудан мақтанышына айналған бұл қылқұйрықтар 2022 жылы «Бесқарағай» деп аталатын қазақы жылқының жаңа типін қалыптастырған аталық іздер саналады. Генетикалық негізіне қарай Шойынқара және Байторы атаулары берілген. Негізгі ерекшеліктері – кез келген ауа райына бейімділігі, ірі денелі әрі етті-сүтті бағытта өнімділігі. Тебіндегі айғырлары 700 келіге дейін, биелері 600 келіге жуық тартады. Сонымен қатар, мініске де, жегіске де шыдамды.
Бұл бағыттағы селекция жұмысына Алматыдағы Қазақ ұлттық аграрлық университеті мен Семейдегі Шәкәрім университетінің ғалымдары атсалысқан. Қазақы жылқыларды будандастыру арқылы жаңа тип шығару тәжірибесі елімізде 1968 жылдан бастау алғаны белгілі. Көрме қорытындысы осы мектептің жалғастығын көрсетіп, Бесқарағай өңірінің жылқы шаруашылығындағы әлеуетін айқындады.
