Semeytany.kz – Мемлекет басшысының тапсырмасына сай Абай облысында 2023–2027 жылдарға арналған дарынды балаларды анықтау, дамыту және қолдау жөніндегі кешенді жоспар жүзеге асуда. Бағдарлама аясында өңірде бірқатар жаңа бастамалар іске қосылып, оқушылардың ерте бейіндеуінен бастап зертханалық тәжірибелеріне дейін жүйелі қолдау көрсетілуде.
«Ғылымдар диалогы» бастамасы арқылы дарынды балаларды ерте кезеңнен қолдау жолға қойылды: «Білім олимп мектебі» шеңберінде жыл сайын 200–250 оқушы елордалық оқу орталықтарына жіберіледі, «Бейіналды даярлық» сыныптарына шамамен 200-ге жуық 7-сынып оқушысы тартылған. «Профессорлық сағат» жобасы бойынша 500 бала жергілікті жоғары оқу орындарының профессорлары жүргізетін дәрістерге қатысады.
Шәкәрім университеті базасындағы «JAS AKADEMIK» жазғы мектебі екі жылдан бері өткізіліп келеді. 2024 жылы жоба Оқу-ағарту министрлігінің балалардың бос уақытын тиімді ұйымдастыруға арналған үздік кейстерінің қатарына енген. Бұдан бөлек «Тур край» аясында 114 туристік-өлкетану жасақтары құрылып, 10 мыңнан астам оқушы қамтылды. Жоба 2024 жылы республикалық деңгейде «Үздік кейс» деп танылды.
«READ & MEDIA» әлеуметтік-педагогикалық жобасы негізінде облыстық конкурстар, оқулар мен олимпиадалар тұрақты өтіп, соңғы екі жылда өңір оқушыларының республикалық көрсеткіштері 24%-ға, халықаралық нәтижелері 18%-ға артқан. «Жетістікке жол» бастамасы «бала–мұғалім–ата-ана» тізбегіндегі өзара әрекеттестікті күшейтіп, аудандарда роуд-шоулар, форумдар және семинарлар ұйымдастырылуда.
Дарынды балалардың зертханалық жұмыстарын жүргізуіне мүмкіндік беру үшін жаңа оқу кабинеттері ашылуда. 2025 жылы Семей қаласындағы №27 мектеп пен №42 мектеп-интернатта заманауи химия кабинеттері пайдалануға берілді. Жалпы, аталған жобалар білім алушылардың академиялық деңгейін тереңдетіп, кәсіби бағдарын айқындауға және әлеуетін ашуға бағытталған. Соның нәтижесінде Абай облысы оқушыларының республикалық әрі халықаралық деңгейдегі жетістіктері тұрақты өсіп келеді.
