Semeitany.kz — Абай атындағы облыстық әмбебап кітапхана директорының орынбасары Гүлмира Аязбаева Қазақстан кітапханалары Одағының шешімімен «Жыл кітапханашысы – 2025» атанды.
Марапат Шымкент қаласында өткен «Қазақстан кітапханалары: кітап оқу мәдениеті, жасанды интеллект және цифрландыру» атты көшпелі отырыста салтанатты түрде табысталды. Жиында Гүлмира Мұратқызы «Жергілікті қаламгерлер шығармашылығы – кітапханалар қорын толықтыру көзі ретінде» тақырыбында баяндама жасап, Абай кітапханасының тәжірибесін таныстырды. Сондай-ақ өңірлік кітапханалардың қор толықтыру бойынша жүзеге асырып жатқан жобалары туралы мәлімет берді.
Абай атындағы облыстық әмбебап кітапханасында бүгінде 400 мыңға жуық кітап қоры бар. Оның ішінде 5 мыңнан аса басылым сирек қорды құрайды. Шамамен 1500 данасы цифрландырылып, оқырманға қолжетімді етілген. Жыл сайын 20 мыңға тарта тұрақты оқырман кітапхананың қызметін пайдаланады. Ұжым «Абай жолы» кітапханасы мен «Алаш» секілді ірі жобаларды жүйелі түрде іске асырып, ұлттық мұраны насихаттап келеді.
Айта кетейік, биыл мамыр айында осы мекеме «Рухани қазына – 2025» фестивалі аясында «Үздік облыстық маңызы бар кітапхана» номинациясын жеңіп алып, 1 млн теңге көлеміндегі жүлдеге ие болған еді. Соңғы марапаттар Абай өңірі кітапханашыларының кәсіби әлеуетін айқындап, саланың дамуына серпін беріп отыр.
