Semeytany.kz — Шымкентте Қазақстан Республикасы Судьялар одағының XI республикалық спартакиадасы мәресіне жетті. Жарыс Қажымұқан атындағы орталық стадионда және қаладағы өзге спорт нысандарында өтті.
Дәстүрлі бәсекеге еліміздің барлық өңірінен 20 команда қатысып, 9 спорт түрі бойынша күш сынасты: шағын футбол, волейбол, арқан тартыс, бильярд, үлкен теннис, үстел теннисі, шахмат, дойбы және тоғызқұмалақ. Қорытындысында Абай облысының судьялар құрама командасы жалпыкомандалық есепте бірінші орынға шығып, спартакиаданың көшбасшысы атанды. Екінші орын Астана қаласының, үшінші орын Маңғыстау облысының командасына бұйырды. Түрлі спорт түрлері мен жеке номинациялар бойынша үздік шыққандар кубоктармен, грамоталармен және бағалы сыйлықтармен марапатталды.
