Semeytany.kz — Бесқарағай ауданы Нұрлыбек Баймұратов атындағы орта мектептің 10-сынып оқушысы Ерасыл Бейсенгазинов өз қолымен экологиялық таза, портативті электр генераторын құрастырып шықты.
Жас өнертапқыштың айтуынша, құрылғыны іске қосу үшін өзен немесе үлкен су қоймасы қажет емес, шағын контейнердегі су да жеткілікті. Қарапайым жұмыс принципі мынадай: ыдыстағы су шағын сорғы арқылы дөңгелек қалақшаларына беріледі, дөңгелек айналған сәтте электр энергиясы өндіріледі. Қазірдің өзінде құрылғы тұрмыстық қарапайым қажеттіліктерге жарамды қуат бере алады.
Ерасыл жобасын қолда бар материалдардан құрастырған: дөңгелекті ескі грампластинкалардан жасап, қалақшаларын пластик бөтелке қақпақтарынан құрастырған. Негізгі 12 вольттік генераторды ескі принтерден алған, су сорғысы ретінде ойыншық субұрқақ қозғалтқышын пайдаланған. Жарық көзіне жарықдиодты шамдар орнатылған. Оның ең басты артықшылығы — ауа райына тәуелсіздігі: күн панелі не жел қондырғысын күтпей-ақ, кез келген жерде қолдануға болады.
Жас конструктор алдағы уақытта үлгіні жетілдіріп, қуатын арттыруды және шағын тұрмыстық техникаларды қосуға бейімдеуді жоспарлап отыр. Жоба Ерасылдың ізденісі мен инженерлік қабілетін ғана емес, энергияны үнемдеу мен қайта пайдалану бағытындағы тиімді шешімдерге деген қызығушылықты да айқын көрсетіп отыр.
Жетекшісі: физика пәні мұғалімі Мейрамғали Жексенаев.
