Semeytany.kz — Абай облысының әкімі Берік Уәли Семейдегі бірқатар нысандарды аралап, «ЖЭО-1» қазандығындағы жөндеу жұмыстарының барысын тексерді. Қаладағы әлеуметтік мекемелерге жылу бірінші кезекте берілді.
«ЖЭО-1» бүгінгі таңда 389 көпқабатты үйді, 51 әлеуметтік нысанды, 60 бюджеттік ұйымды және 632 коммерциялық кәсіпорынды жылумен қамтамасыз етеді. Жалпы абоненттер саны — 24 463. Орталықта бес ірі қазандық бар: төртеуі негізгі, біреуі резервте. Биыл бірқатар қазандықтарда ауа қыздырғыштары мен көмір жүретін құбырлар толық ауыстырылып, экранды құбырлар жаңартылды. Кәсіпорын басшысы Алмас Күзкеновтың айтуынша, су жүйесінде де ауқымды жаңғырту жасалды: Ертіс суын айдайтын, 1960-жылдардан бері қызмет еткен сорғы қондырғылары түгелдей алмастырылған. Көмір қоры жеткілікті — қоймада 74 мың тонна бар.
Облыстың барлық қала-аудандарында жылу көздері іске қосылып, абоненттерді жүйеге кезең-кезеңімен қосу жүріп жатыр. Әлеуметтік нысандар бірінші болып жылытылды, ал барлық тұтынушыларды толық қосу 5 қазанға дейін аяқталмақ. Аймақ басшысы көмір қоймасын қарап, мердігерлерге жұмысты мерзімінде әрі сапалы атқаруды тапсырды. Оның сөзінше, Үкімет қолдауымен өңірдегі тозығы жеткен жылу желілерін қалпына келтіру мен ауыстыру жұмыстары жүйелі түрде жалғасады.
Биыл Үкімет резерві және облыстық бюджет есебінен Семейдегі жылу электр орталығында, Аягөз қаласының «Орталық» қазандығында және жылу желілерінде жаңғырту жүргізілді. Сондай-ақ Жарма ауданының Шуақ ауылындағы қазандық жөнделді.
