Semeytany.kz — Семейде қала әкімінің міндетін атқарушы Бекжан Бапышевтың төрағалығымен өткен отырыста заңсыз нысандарды жою, шағын бизнесті қолдау және қысқы жол күтімі талқыланды. Жиынға бөлім басшылары, құқық қорғау және коммуналдық қызмет өкілдері қатысты.
Жыл басынан бері қалалық мониторинг нәтижесінде 411 заңсыз орнатылған металл гараж анықталды. Оларды алу жұмыстары кезең-кезеңімен жүріп жатыр. Сонымен қатар, кәсіпкерлікті қолдау аясында биыл 328 азаматқа кеңес беріліп, оның ішінде 156 үміткерге мемлекеттік грант алу тәртібі түсіндірілген.
Қысқы маусым бойынша: 2024–2025 жылдары Семейден 198 мың текше метр қар шығарылған. 2025–2026 жылдың қысына дайындық кестеге сай жалғасуда, атқарылымы күнделікті бақылауда.
Бекжан Бапышев жауапты бөлімдерге нақты тапсырма беріп, жұмыстың қарқынын төмендетпеуді қатаң тапсырды. «Әр мәселе – тұрғындардың өмір сапасына тікелей әсер етеді. Нәтиже үшін жүйелі әрі қарқынды жұмыс қажет», – деді ол.
