Semeytany.kz — Әлеуметтік желіде 77 жастағы зейнеткерді үйден шығару барысында полиция қызметкерлері күш қолданған сәт түсірілген видео тарады. Оқиға 2 қазан күні Іле ауданы, Өтеген Батыр кентінде болғаны айтылады.
Видео кадрларында тәртіп сақшылары қарияны пәтерден итеріп шығарып бара жатқанда, бір қызметкердің қатты итеруі салдарынан әйел адамның баспалдақ қоршауына соғылғаны көрінеді. Автордың сөзінше, аудандық аурухана бастапқыда науқасты «айтарлықтай жарақат жоқ» деп қабылдамаған. Кейін қалалық аурухананың травмпунктінде зейнеткердің қабырғасы сынғаны анықталған.
Белгілі болғандай, пәтер сот істеріне байланысты прокурорлық қадағалау органдарының шешімімен уақытша жабылған. Тұрғындар жылы киімдері мен қажетті заттарын алу үшін ішке кіруге рұқсат сұраған. Заттарын жинау кезінде полиция қызметкерлері «жылдамдатыңдар» деп итермелей бастағаны айтылады.
Алматы облысы полиция департаменті жағдайға түсініктеме беріп, оқиға орнына қадағалау органдары және сот орындаушыларымен бірге тұрғын үйден шығару туралы сот шешімін орындау үшін барғанын мәлімдеді. Дегенмен департамент басшысы Мейрам Әбікенов (Абикеев) полиция қызметкерінің дөрекі әрекеті дұрыс емес екенін атап, бұл факт бойынша қызметтік тергеу тағайындалғанын, кінәлілер қатаң жауапқа тартылатынын және тексеріс барысы өзінің жеке бақылауында екенін айтты.
