Semeytany.kz — Абай облысында облыс әкімі Берік Уәлидің төрағалығымен өңірлік инвестициялық штабтың отырысы өтті. Жиынға инвесторлар, кәсіпкерлер, сондай-ақ құқық қорғау және мемлекеттік органдардың өкілдері қатысты.
Отырыста «EMA Ltd» ЖШС және «Шығыс ШПЗ» ЖШС жобаларының жүзеге асырылу барысы мен түйткілді мәселелерін шешу жолдары қаралды. Негізгі капиталға инвестиция тарту көрсеткіштері және биыл жалпыұлттық пулға енгізілген бастамалардың орындалуы туралы Кәсіпкерлік және индустриялық-инновациялық даму басқармасының басшысы Айбек Рахымбеков баяндама жасады.
Облыста инвестиция тарту жүйелі жүргізілуде: 2025 жылы негізгі капиталға салынған инвестициялар 275,7 млрд теңгені құрады. Оның 194,4 млрд теңгесі – жеке қаражат, яғни жалпы көлемнің 70,5 пайызы. Аймақтың инвестициялық пулына жалпы құны 3,2 трлн теңге болатын, 14,4 мың жұмыс орнын қамтитын 97 жоба енгізілген, оның 45-і Ұлттық цифрлық инвестициялық платформада тіркелген.
Биыл құны 25,2 млрд теңге болатын 11 жобаны іске асыру жоспарланып отыр, олар 631 жаңа жұмыс орнын құрады. Қазіргі таңда 2,3 млрд теңгелік 3 жоба пайдалануға беріліп, 64 жұмыс орны ашылды. Қалған бастамалар жыл соңына дейін аяқталмақ.
Жиын қорытындысында аймақ басшысы басқармалар мен қала, аудан әкімдіктеріне инвесторларға жан-жақты қолдау көрсетіп, туындаған кедергілерді жедел шешуді тапсырды. Берік Уәли әрбір жоба өңірдің әлеуметтік-экономикалық дамуына серпін беретінін атап өтіп, заңнамаға сай барлық бастамаларға қажетті қолдау жасалатынын жеткізді.
