Semeytany.kz — Абай облысында өткен кеңейтілген аппараттық кеңесте күзгі дала жұмыстарының барысы талқыланды. Жиында облыс әкімі Берік Уәли тиісті басқармаларға науқанды 1 қарашаға дейін аяқтауды тапсырды.
Облыстық ауыл шаруашылығы басқармасының мәліметінше, биыл егістік көлемі 782,1 мың гектарға жетіп, өткен жылмен салыстырғанда 22 мың гектарға өсті. Құрамында майлы дақылдар – 339,4 мың га, дәнді дақылдар – 296,5 мың га. Президент тапсырмасына сәйкес бидай алаңы 11,9 мың га қысқарып, майлы дақылдар 42,5 мың га ұлғайған. 2025 жылғы 6 қазанға дейін 238,9 мың га алқап орылып, 265,2 мың тонна астық бастырылды. Сонымен бірге 96,6 мың тонна картоп, 101,6 мың тонна көкөніс-бақша жиналған. Дәнді дақылдардың болжамды түсімі – 332 мың тонна.
Жиналған өнімді сақтау үшін өңірде 4 лицензияланған элеватор және жалпы сыйымдылығы 870,9 мың тонна болатын қоймалар жұмыс істейді. Науқанға 23,7 мың тонна дизель отыны бөлінген. Егін жинауға 4 мың трактор, 2,4 мың комбайн және 700 орақ тартылды. Биыл 394 бірлік жаңа техника алынып, паркті жаңарту деңгейі 4,5%-ға жетті, жыл соңына дейін 6,5%-ға дейін жеткізу жоспарланған. «Кең Дала» және «Кең Дала-2» бағдарламалары аясында облысқа 18 млрд теңге қаржы қарастырылған.
«Приречное» агрофирмасының тәжірибесіне сүйене отырып, 2028 жылға дейін барлық аудан мен қала маңында кемінде 50 гектардан тамшылатып суару арқылы көкөніс пен картоп егу көзделіп отыр. Жобалар «Ауыл аманаты» бағдарламасы арқылы қаржыландырылады. Аймақ басшысы ет және сүт кластерін дамытуға, сондай-ақ суармалы егіншілікті кеңейтуге басымдық берілетінін атап өтті. «Үлкен қалалардың жанында азық-түлік белдеуін қалыптастыру» тапсырмасына сай, Семей іргесіндегі шаруашылықтарды қолдау арқылы тұрақтандыру қорының әлеуеті күшейтіледі, деді Берік Уәли.
