Semeytany.kz – Моңғолияның Баян-Өлгей аймағында Дүниежүзілік «Бүркітшілер тойы» аясында өткен ІІІ Азия чемпионатында Қазақстан құсбегілік құрамасы жоғары нәтиже көрсетіп, жүлдегер атанды.
36 жылдық тарихы бар бұл халықаралық дода Моңғолияның мәдени бренді саналады. Жыл сайын әлемнің түкпір-түкпірінен мыңдаған турист пен бүркітші жиналатын мерекеге биыл қазақ құсбегілерін мемлекеттік жаттықтырушылар Арманбек және Базарбек Күнтуған бастап барды. Чемпионатқа 60-тан астам құсбегі қатысып, «қолға шақыру» және «шырға тарту» сайыстарында бақ сынады.
Қазақстан ұлттық құрамасы сапында ел намысын қорғаған Абай облысының бүркітшісі Тәттімбет Кәпұлы «Қарагер» атты қыранымен үшінші орын иеленді. Ал атыраулық құсбегі Арман Қошқаров «Аңырақай» бүркітімен екінші орын алып, ел абыройын асқақтатты. Жарыс қорытындысы бойынша құрама құрамындағы спортшылардың тұрақты дайындығы мен шеберлігі жоғары бағаланды.
