Semeytany.kz — Қазақстанның Ауыл шаруашылығы министрі Айдарбек Сапаров Абай облысына жұмыс сапарымен келіп, облыс әкімі Берік Уәлимен бірге Семей қаласы мен іргелес аумақтағы ет өнімдерін өңдеу және көкөніс өсіру кәсіпорындарының жұмысымен танысты.
Министр делегациясы алдымен 2012 жылы құрылған «АРАЙ-EAST FOOD» ЖШС-не барды. Халал стандартымен шұжық пен деликатестер өндіретін кәсіпорында үш өндірістік цех, орау желісі жұмыс істейді. Өткен жылы қосымша желі іске қосылып, кәсіпорынның жылдық қуаты 1,8 мың тоннаға жетті. Мұнда 120 адам еңбек етеді, өндіріс көлемі алдағы уақытта ұлғаймақ.
Жаңасемей ауданы, Шақаман ауылында ет және ет өнімдерін терең өңдейтін өндірістік кешеннің құрылысы жүріп жатыр. Жоба Абай облысын 2027 жылға дейін дамытудың кешенді жоспарына енгізілген және ұлттық деңгейде басым. Кешен бір ауысымда 35 тоннаға дейін шикізат өңдеп, ірі қара, қой, жылқы етінен шұжық, консерві, жартылай фабрикат және деликатес өндіруді мақсат етеді. Нысан толық іске қосылғанда 1000 тұрақты жұмыс орны ашылады. Пайдалануға беру 2026 жылдың тамыз айына жоспарланған.
Сапар барысында «Агрофирма Приречное» ЖШС-нің егіс алқаптары мен қоймалары көрсетілді. 1993 жылдан бері жұмыс істейтін шаруашылық мал және өсімдік шаруашылығын қатар дамытады, 110 адамды жұмыспен қамтыған. Жалпы егістік көлемі – 6 793 гектар, оның 1 787 гектарына картоп, көкөніс және мал азығы егілген. Өнім 14 мың тонна сыйымдылығы бар жеті қоймада сақталады. Биыл қоймаларға 700 тонна сәбіз және 5 мың тонна картоп жеткізілді. Шаруашылық облыстық тұрақтандыру қорын көкөніспен қамтамасыз етіп келеді.
Министр мен облыс әкімі сарымсақ, сәбіз, қырыққабат егілген алқаптарды, көкөніс сақтайтын қоймаларды аралап, 5 мың басқа арналған бордақылау алаңының құрылыс орнын көрді. Құны 4 млрд теңгелік жоба келесі жылы аяқталады. Айдарбек Сапаров өңірде қолға алынған бастамаларды жоғары бағалап, министрлік мемлекеттік бағдарламалар аясында қолдау көрсетілетінін айтты.
