Semeytany.kz — Ауыл шаруашылығы министрі Айдарбек Сапаров жұмыс сапарымен Абай облысына келіп, Семейде жергілікті тауар өндірушілерімен кездесті. Жиынға облыс әкімі Берік Уәли, шаруашылық жетекшілері мен кәсіпорын басшылары қатысты.
Кездесуде саланы әртараптандыру, өңдеу кәсіпорындарын дамыту, инвестиция тарту және облыста салынып жатқан ет комбинатының барысы талқыланды. Облыс әкімі Президент Қасым-Жомарт Тоқаевтың тапсырмасына сай, биыл ауыл шаруашылығының негізгі капиталына 32 млрд теңге инвестиция тартылғанын, бұл өткен жылмен салыстырғанда 170%-ға жоғары екенін айтты. 2030 жылға дейін өңірлік карта бойынша 197,5 млрд теңгеге 85 ірі агрожоба іске асырылмақ.
Абай облысының аграрлық әлеуеті жоғары: өңірде 11 мыңға жуық агроқұрылым жұмыс істейді. 2025 жылдың қаңтар–тамыз айларында ауыл шаруашылығы өнімінің жалпы көлемі 221 млрд теңгеге жетіп, республикада төртінші орынға тұрақтады. Нақты көлем индексі – 102,9%. Егіс алқабы 782,1 мың гектарды құрайды, соның 80 пайызы орылып, 265,2 мың тонна астық бастырылды. Бұған қоса, 96,6 мың тонна картоп және 101,6 мың тонна көкөніс жиналды.
Министр Айдарбек Сапаров фермерлердің сұрақтарына жауап беріп, қолдау тетіктері түсіндірілетінін жеткізді. Оның айтуынша, облыста салынатын ірі ет комбинаты мал шаруашылығын жаңа деңгейге шығаруға ықпал етеді. Сапар аясында министр кәсіпорын құрылысының алаңына баруды жоспарлап, ведомство тарапынан тиісті көмек көрсетілетінін атап өтті.
