Semeytany.kz — Абай облысының әкімі Берік Уәли бүгін «Елімай-М» және негізгі «Елімай» командасының ойыншыларымен, бапкерлерімен және жанкүйерлер өкілдерімен кездесті.
Аймақ басшысы алдымен маусымды сәтті өткізген «Елімай-М» ұжымын қабылдап, Солтүстік-шығыс конференциясында 37 ұпай жинап, үздік үштікке іліккендері үшін құттықтады. «Бұл – табандылық пен бірліктің нәтижесі. Команданың жергілікті жастардан жасақталуы Семей футбол мектебінің әлеуетін айқын көрсетті», – деді Берік Уәли.
Кездесуде жанкүйерлер қозғалысының ардагері Саясат Сәрсембинов, сондай-ақ «Елімай» ФК АҚ директорлар кеңесінің мүшелері Асқар Ұранхаев, Серік Байғалиев, Айрат Базенов, бапкерлер құрамы мен футболшылар марапатталды. «Жас ойыншыларымыздың өсуі арқылы Семейдің қазақ футболының алтын бесігі екені тағы дәлелденді», – деді Саясат Сәрсембинов.
Одан кейін облыс әкімі «Спартак» стадионында негізгі командамен жүздесіп, алдағы шешуші матчтарда сәттілік тіледі. «Семей – қазақ футболының отаны. 1913 жылы тұңғыш ресми матч осы қалада өтті, ал Мұхтар Әуезовтің өзі доп қуған. Бүгін «Елімай» сол дәстүрді лайықты жалғастырып келеді. Президент Қасым-Жомарт Тоқаев Жолдауында айтқан футбол клубтарын коммерцияландыру бағытымен, біздің клуб халықтық модельге өтудің негізін қалап жатыр: алдағы уақытта акциялар биржаға шығарылып, жанкүйер мен инвестор клуб тарихының бір бөлігіне айналады», – деді Берік Уәли.
2022 жылы қайта құрылған «Елімай» қысқа мерзімде ел футболындағы басты клубтардың біріне айналып, 2023 жылы Бірінші лигада чемпион атанды да, 2024 жылы Премьер-лигаға оралды. Қазір семейлік клуб 24 тур қорытындысы бойынша 42 ұпаймен турнир кестесінде 5-орында келеді. Маусымның соңғы екі турында қарсыластар – «Тұран» және «Атырау».
