Semeytany.kz — Абай облысында туризмді әртараптандыруға ден қойылды. Өңірлік коммуникациялар қызметіндегі баспасөз мәслихатында облыстық Туризм басқармасының басшысы Марат Қабақов киелі, экотуристік және технотуристік бағыттарды кешенді дамыту жоспарын таныстырды.
Спикердің мәліметінше, Семей – Қарауыл бағыты бойында 19 мәдени-тарихи нысан бар. Олардың қатарында «Абай–Шәкәрім» мемориалдық кешені, Жидебай қорығы, Қоңыр әулие үңгірі, «Еңлік–Кебек» кесенесі және өзге де киелі орындар қамтылады. Қонақүй мен демалыс инфрақұрылымының жеткіліксіздігі әлі де өзекті мәселе саналады. Осы олқылықты түзеу үшін Абайдың мемориалдық үй-мұражайы жанынан визит-орталық, кафе және қонақүй салу жобасына шамамен 1 млрд теңге инвестиция тарту жоспарланып отыр.
Экотуризм бойынша Семейдің іргесіндегі 650 мың гектардан астам қарағайлы орман мен Тарбағатай ұлттық паркі негізгі тартым нысандары ретінде қарастырылуда. Қарағайлы алқапта оннан астам жануар түрі мекендейді, экологиялық соқпақтар төселіп, инвестор қызығушылығы артып келеді.
Технотуризм бағыты өңірдің бірегей ғылыми-тарихи нысандарымен байланысты. Оның ішінде бұрынғы Семей ядролық сынақ полигоны шетелдік зерттеушілер мен тақырыпқа қызығатын туристерді тартуға мүмкіндік береді.
Марат Қабақовтың айтуынша, осы үш бағытты жүйелі ілгерілету өңірдің өзіндік туристік брендин қалыптастырып, ішкі және сыртқы туристер ағынын ұлғайтуға жол ашады.
