Semeytany.kz — Абай облысының әкімі Берік Уәли аты аңызға айналған таеквондо шебері, қазақтың батыр ұлы Мұстафа Өзтүріктің қызы Неслихан Өзтүрікпен кездесті. Басқосуға түркиялық және отандық кәсіпкерлер Омар Тәйжі мен Қайша Керей де қатысты.
Кездесуде Мұстафа Өзтүрік есімін ұлықтау, оның өнегелі өмір жолын жас ұрпаққа кеңінен насихаттау мәселелері талқыланды. Германияның Мюнхен қаласында тұратын Неслихан Өзтүрік ата-бабаларының кіндік қаны тамған өңірге алғаш рет келіп, құрметті қабылдауға алғыс білдірді.
Неслихан Өзтүрік: «Мен Германияда туып-өстім. Абай еліне, Семей қаласына алғаш рет келіп отырмын. Құрмет көрсетіп, жылы қабылдағандарыңызға зор алғысымды білдіремін. Ата-бабаларымның туған жеріне келіп, ерекше сезімді бастан кешіп отырмын», — деді.
Аймақ басшысы Берік Уәли Мұстафа Өзтүрік тұлғасын Абай облысында кеңінен дәріптеу бағытындағы бастамаларға қолдау көрсетілетінін атап өтті: «Мұстафа Өзтүрікті еліміз жақсы біледі, бәріміз мақтан тұтамыз. Ол тәуелсіздік жылдары елге жиі келіп, халқымен етене араласты. 1994 жылы Мақаншы ауданына арнайы келгенде елдің ықыласы ерекше болды. Абай облысында Мұстафа Өзтүріктің есімін насихаттауға қатысты ұсыныстарыңызды қарастырып, қолдау білдіруге дайынбыз», — деді ол.
Мұстафа Өзтүрік — әлемге танылған таеквондо шебері, Қазақстанда осы спорттың дамуына серпін берген тұлға. Кездесуде оның мұрасын жүйелі түрде таныту, өңір жастары үшін спорттық-тәрбиелік жобаларды іске қосу мүмкіндіктері сөз болды. Қорытындысында тараптар бірлескен бастамаларды пысықтауға уағдаласты.
